ກະຊວງໂຍທາທິການ ແລະ ຂົນສົ່ງຈະປັບປຸງລະບົບການສັນຈອນໃນຕົວເມືອງຕ່າງໆຂອງນະຄອນຫລວງວຽງຈັນຄັ້ງໃຫຍ່ເພື່ອແກ້ໄຂສະພາບແອອັດສັບສົນຄືດັ່ງປັດຈຸບັນໃຫ້ຫລຸດຜ່ອນລົງ.
ທ່ານ ສົມນຶກ ເມກຕະກຸລ ຫົວໜ້າພະແນກຄຸ້ມຄອງການຈໍລະຈອນທາງບົກ ແລະ ການຂັບຂີ່ ກົມຂົນສົ່ງກະຊວງໂຍທາທິ ການ ແລະ ຂົນສົ່ງ ໃຫ້ຮູ້ໃນວັນທີ 8 ສິງຫານີ້ ຢູ່ກະຊວງດັ່ງກ່າວວ່າ: ການປັບປຸງລະບົບການສັນຈອນໃໝ່ນີ້ ແມ່ນການແກ້ໄຂບັນຫາການສັນຈອນແອອັດສຳລັບສະເພາະໜ້າ ພາຍຫລັງໄດ້ຮັບການສະໜັບສະໜູນທຶນຈຳນວນ 5 ແສນກວ່າໂດລາສະຫະລັດຈາກທະນາຄານໂລກ (WB) ໂດຍສະເພາະເພື່ອປັບປຸງການສັນຈອນໃນເສັ້ນທາງໄກສອນ, ຖະໜົນ 23 ສິງຫາ, ຖະໜົນ T2, ຖະໜົນດົງປ່າລານ ແລະ ບາງເສັ້ນທາງອ້ອມຂ້າງຈຳນວນໜຶ່ງ ໃນນີ້ປະ ກອບມີການຕິດຕັ້ງປ້າຍຫ້າມຢຸດ, ຫ້າມຈອດຕະຫລອດທາງໃນຊົ່ວໂມງເລັ່ງດ່ວນ, ຕິດຕັ້ງລະບົບໄຟອຳນາດ ແລະ ປັບວົງຈອນໄຟອຳນາດຈຳນວນ 23 ຈຸດ, ກຳນົດເຂດເຫລືອງ, ຕິດຕັ້ງຖັງຢາງໃນຈຸດທາງຄົບແຍກບາງຈຸດ, ປ່ຽນ ຊ່ອງທາງແລ່ນສອງເບື້ອງມາເປັນເບື້ອງດຽວ ແລະ ປ່ຽນບາງ
ຊ່ອງທາງແລ່ນໄດ້ເບື້ອງດຽວມາເປັນສອງເບື້ອງ, ເອົາປ້າຍລ້ຽວ ຂວາໄດ້ອອກ ແລະ ປົດປ້າຍກຳນົດການສັນຈອນທີ່ເຫັນວ່າບໍ່ແທດເໝາະອອກ ໂດຍຈະໃຫ້ສຳເລັດໃນຕົ້ນປີ 2014. ທ່ານ ສົມນຶກ ກ່າວວ່າ: ພຶດ ຕິກຳຂອງຜູ້ໃຊ້ລົດໃຊ້ຖະໜົນທີ່ພາໃຫ້ເກີດຄວາມແອອັດສັບສົນຕໍ່ການສັນຈອນສ່ວນໜຶ່ງມາຈາກຂັບຂີ່ບໍ່ໄປຕາມເລນ, ຂີ່ສວນທາງ, ມີລັກສະນະເຫັນແກ່ຕົວ, ມັກງ່າຍ, ຍາດຊີງກັນໄປ, ຈອດລົດຜິດລະ ບຽບ ແລະ ສິ່ງປິ່ນອ້ອມອື່ນໆກໍມີສ່ວນກໍ່ໃຫ້ເກີດບັນຫາເຊັ່ນດຽວກັນ ເປັນຕົ້ນໄຟອຳນາດບາງບ່ອນບໍ່ເໝາະສົມ, ມີລັກສະນະໄວໂພດ ຫລື ຊ້າໂພດ ບໍ່ສົມຄູ່ກັບປະລິມານການສັນຈອນ, ບາງເສັ້ນທາງມີຈຸດຕັດຫລາຍເກີນໄປ ແລະ ການສັນຈອນໃນທິດທາງດຽວບາງສາຍບໍ່ແທດເໝາະກັບສະພາບຕົວຈິງ ຈຶ່ງກໍ່ໃຫ້ເກີດມີການສັນຈອນຕິດຂັດໃນເວລາຮີບດ່ວນ ໂດຍສະເພາະໂມງເຂົ້າ ການ-ເລີກການ.
ທ່ານ ທອງວັນ ເພັດທະວີແສງ ຮອງຫົວໜ້າກົມຂົນສົ່ງ ກະ ຊວງໂຍທາທິການ ແລະ ຂົນສົ່ງ ກ່າວວ່າ: ໃນປີ 2012 ຜ່ານມາ, ທົ່ວປະເທດມີຈຳນວນອຸປະຕິເຫດເກີດຂຶ້ນຫລາຍກວ່າ 6.000 ກໍລະ ນີ, ມີຜູ້ເສຍຊີວິດຫລາຍເຖິງ 888 ຄົນ, ໃນນັ້ນ ສະເພາະຢູ່ນະຄອນ ຫລວງວຽງຈັນເກີດຂຶ້ນ 1.644 ກໍ ລະນີ, ມີຜູ້ເສຍຊີວິດ 205 ຄົນ ເຊິ່ງເປັນອັດຕາສ່ວນສູງ ເມື່ອທຽບໃສ່ປະເທດອື່ນໆ. ປັດຈຸບັນທົ່ວປະເທດມີພາຫະນະປະມານ 1,2 ລ້ານຄັນ, ຢູ່ນະຄອນຫລວງວຽງຈັນມີປະມານ 535.435 ຄັນ (ເທົ່າກັບ 42%), ໃນນັ້ນ ລົດຈັກກວມປະມານ 70%, ລົດໃຫຍ່ກວມເອົາ 25%, ລົດບັນທຸກ, ລົດເມ ແລະ ລົດສາມລໍ້ 5%. ພາຫະນະຫລາຍກວ່າ 50% ແມ່ນແລ່ນຕາມຖະ ໜົນໃນນະຄອນຫລວງວຽງຈັນ ເຊິ່ງເຮັດໃຫ້ເກີດສະພາບການສັນ ຈອນນັບມື້ນັບແອອັດ ໂດຍສະເພາະໃນເວລາເລັ່ງດ່ວນເຂົ້າ ການ-ເລີກການ.ດັ່ງນັ້ນ, ພັກ ແລະ ລັດຖະບານ ຈຶ່ງຖືເປັນບັນຫາທີ່ຕ້ອງໄດ້ຮັບການແກ້ໄຂຮີບດ່ວນ, ແຕ່ຄວາມຈິງແລ້ວ ບັນຫາອຸປະຕິເຫດທາງຖະໜົນ, ລົດຕິດ, ການຈາລະຈອນແອອັດ ແມ່ນບັນຫາທີ່ທຸກ ພາກສ່ວນໃນສັງຄົມຕ້ອງໄດ້ພ້ອມກັນແກ້ໄຂ. ມັນບໍ່ແມ່ນບັນ ຫາຂອງຜູ້ໃດຜູ້ໜຶ່ງ ຫລື ຂະແໜງການໃດໜຶ່ງຈະແກ້ໄຂໂດຍລຳພັງໄດ້. ແນ່ນອນວ່າ ກະຊວງໂຍທາທິການ ແລະ ຂົນສົ່ງ ອາດເປັນຜູ້ສ້າງຖະໜົນ, ຕິດຕັ້ງ ປ້າຍສັນຍານຈາລະຈອນ, ອອກລະບຽບກົດ ໝາຍ, ກຳນົດກົດຈະລາຈອນ, ກຳນົດມາດຕະຖານເຕັກນິກລົດ, ກຳນົດມາດຕະ ຖານສອບເສັງໃບຂັບຂີ່ ແລະ ອື່ນໆ. ແຕ່ກະຊວງປ້ອງກັນຄວາມສະຫງົບ ເປັນຜູ້ບັງຄັບໃຊ້ລະບຽບກົດໝາຍ, ກວດ ການັກຂັບຂີ່ຕາມຖະໜົນ. ກະ ຊວງສຶກສາເປັນຜູ້ສ້າງ ຫລື ສອນຄົນໃຫ້ຮູ້ເຄົາລົບກົດໝາຍ ແລະ ປະຕິບັດຕາມລະບຽບຢ່າງເຂັ້ມ ງວດ ແລະ ກະຊວງຖະແຫລງ ຂ່າວ, ວັດທະນະທຳ ແລະ ທ່ອງທ່ຽວ ເປັນຂະແໜງການສຳຄັນໃນການປະກາດໂຄສະນາເຜີຍແຜ່ໃຫ້ສັງຄົມຊາບ ເພື່ອໃຫ້ທຸກຄົນປະຕິບັດຕາມ ແລະ ໃຫ້ການຮ່ວມມື ເພື່ອການຂັບຂີ່ສະດວກປອດໄພ ແລະ ປາສະຈາກອຸປະຕິເຫດ.
