ປັດຈຸບັນເຈົ້າໜ້າທີ່ ປກສ ເມືອງ ສີສັດຕະນາກ ນະຄອນ ຫຼວງວຽງຈັນ ພວມເລັ່ງຕິດ ຕາມສືບສວນນຳຈັບຄົນຮ້າຍ ທຸບແວ່ນລົດໂຕໂຍຕ້າ ວີໂກ້ ຄັນໜຶ່ງໝາຍເລກທະບຽນ ບທ 2512(ປ້າຍປະເທດໄທ) ທີ່ຈອດໄວ້ຢູ່ແຄມທາງເຂດບ້ານ ດົງປ່າລານ ເມືອງ ສີສັດຕະນາກ ນະ ຄອນຫຼວງວຽງຈັນ, ໃນວັນທີ 5 ສິງຫາ ນີ້ ແລະ ຜູ້ຮ້າຍໄດ້ລັກເອົາເງີນ ຈຳນວນ 5 ລ້ານກ່ວາກີບທີ່ປະໄວ້ໃນລົດດັ່ງກ່າວ, ຜູ້ເປັນເຈົ້າຂອງລົດແຈ້ງວ່າ: ຕົນໄດ້ນອນຢູ່ໃນເຮືອນ ແລະ ໄດ້ຈອດລົດໄວ້ ໜ້າບ້ານ ຈາກນັ້ນໄດ້ຍິນສຽງແກ້ວແວ່ນແຕກ ຈຶ່ງຟ້າວແລ່ນອອກມາເບິ່ງ ພົບວ່າເຫັນແວ່ນລົດຕົນເອງຖືກທຸບ ຈຶ່ງໄດ້ແຈ້ງຕໍ່ເຈົ້າໜ້າທີ່ເພື່ອຊ່ວຍນຳຕາມຫາຄົນຮ້າຍມາດຳເນີນຄະດີ.
ເຈົ້າໜ້າທີ່ ປກສ ເມືອງ ສີສັດ ຕະນາກ ໃຫ້ຮູ້ວ່າ: ຜ່ານການເກັບກຳຂໍ້ມູນ ແລະ ກວດກາສະຖານທີ່ເກີດເຫດ ແລະ ກວດກາກ້ອງວົງຈອນປິດ ພົບວ່າຜູ້ຕ້ອງສົງໃສ ໄດ້ເຂົ້າໄປໃນບ້ານຂອງຜູ້ເສຍຫາຍ ກ່ອນຈະລົງມືທຸບແວ່ນລົດແລ້ວນຳເອົາເງີນສົດຫຼົບໜີໄປ.
ແນວໃດກໍຕາມ ເຫດການທຸບແວ່ນລົດແມ່ນຖືເປັນປະກົດການຫຍໍ້ທໍ້ທາງສັງຄົມ ເຊິ່ງຜ່ານມາກໍມີການເກີດສະພາບດັ່ງກ່າວຂື້ນຫຼາຍແຫ່ງຢູ່ ນະຄອນຫຼວງ ວຽງຈັນຄື: ໃນປີຜ່ານມາ ໄດ້ມີຄົນຮ້າຍທຸບແວ່ນລົດທີ່ຈອດໄວ້ຢູ່ເຂດບ້ານ ທົ່ງສາງນາງ ເມືອງ ຈັນທະບູລີ ນະຄອນຫຼວງວຽງຈັນ ໄດ້ເງີນໄປ 100 ລ້ານກ່ວາກີບແລ້ວຫຼົບ ໜີໄປ ແລະ ເມື່ອບໍ່ດົນມານີ້ ກໍໄດ້ເກີດເຫດຄົນຮ້າຍທຸບແວ່ນລົດຂອງປະຊາຊົນ ຢູ່ເຂດ ບ້ານ ໂພນທັນ ເມືອງ ສີສັດຈະນາກ ນະຄອນຫຼວງ ຽງຈັນ ເຊິ່ງທາງເຈົ້າໜ້າທີ່ເລັ່ງຕິດຕາມນຳຈັບຄົນຮ້າຍທີ່ກໍ່ເຫດມາດຳເນີນຄະດີ ແລະ ສະເພາະໃນ 6 ເດືອນຕົ້ນປີມີເຫດການຄົນຮ້າຍທຸບແວ່ນລົດ ເພື່ອຊີງຊັບມາແລ້ວ 9 ຄັ້ງ.
